جیتے ہیں وے ہی لوگ جو تھے کچھ خدا کے ساتھ

دیوان ششم غزل 1870

مرتے ہیں ہم تو اس صنم خودنما کے ساتھ

جیتے ہیں وے ہی لوگ جو تھے کچھ خدا کے ساتھ

دیکھیں تو کار بستہ کی کب تک کھلے گرہ

دل بستگی ہے یار کے بند قبا کے ساتھ

اے کاش فصل گل میں گئی ہوتی اپنی جان

مل جاتی یہ ہوا کوئی دن اس ہوا کے ساتھ

مدت ہوئی موئے گئے ہم کو پر اب تلک

اڑتی پھرے ہے خاک ہماری صبا کے ساتھ

ہم رہتے اس کے محو تو وہ کرتا ہم کو سہو

ہرگز وفا نہ کرنی تھی اس بے وفا کے ساتھ

کیفیت آشنا نہیں اس مست ناز کی

معشوق ورنہ کون ہے اب اس ادا کے ساتھ

منھ اپنا ان نے عکس سے اپنے چھپا لیا

دیکھا نہ کوئی آئینہ رو اس حیا کے ساتھ

ٹھہرا ہے رونا آٹھ پہر کا مرا علاج

تسکین دل ہے یعنی کچھ اب اس دوا کے ساتھ

تھا جذب آگے عشق سے جو ہر نفس میں میر

اب وہ کشش نہیں ہے سحر کی دعا کے ساتھ

میر تقی میر